جديد الموقع
تراثنا الشعبي

الشمس ما بتغيب..!

23-6-2012 3:55 AM

  عدنان كنفاني

 

هي جارتي

والباب حد الباب

ويمكن أنا متلا

 

وكتار يااللي فارقوا

أحباب

 

وفـ يوم

متل اليوم.!

سمعت صوت صراخ

مفزوعة

 

سمعت متل موّال

متل بحّة

وتر

 

كانت بلا المنديل بالحارة

وشعرها عريان

ومتل مجنونة

عم تصرخ

وصراخها يعلا

وتضرب عصدرا

 

سمعتها بتقول

 

غابت شمس نيسان

والبنت ما رجعت

 

ويلي يا يمّا

البنت ما رجعت

 

يا ويل روحي

البنت ما رجعت

 

طارت عيوني

وصحت..

يا فاطمة..

من وين كان الدرب

ياللي يجيبها.؟

 

من هون.؟

لأ من هون.؟

 

وكل لحظة تفوت

متل سفرة عمر

وفاطمة عالباب مجنونة

لحظة بتصرخ

ولحظة بتلطم

ولحظة بتسألني

إنتِ يا يختي

بتعرفي بنتي.؟

 

بنتي متل شتلة حبأ

كل يوم بستنا رجوعها

من المدرسة

وبشوفها لمن تجي من بعيد

لابسة مريولها الأزرق

وحزمة كتب عاصدرها

وخدودها حمرا

متل طلّة بدر

وجديلة شعر صففتها بإ يدي

بتركض وراها

 

يا ويل قلبي

 

غابت شمس نيسان

والبنت ما رجعت

 

يا فاطمة....

وغصّة حزن علقت

بزوري..!

 

إيش بدي أقوللها.؟

بنتك خلص راحت.؟

بنتك متل بنتي

ومثل خيي ومتل بيي

متل الشجر

وبرج الحمام

متل السقوف مهدمة

متل الشوارع

كلها ألغام

 

إيش بدي أقوللها

 

يا فاطمة

خلي شوية دمع لبكرة

والبنت ما حبت تجي بنيسان

راحت وصارت

هي قلب نيسان

 

ونيسان بيروح

وبيرجع

وبنتك معه

بترجع

وبنتي كمان يا فاطمة

لمن يجي نيسان

رح ترجع

 

يختي تعالي

وضميني.. وواسيني

بتتذكري من كام يوم.؟

يمكن سمعتيني

وكنت متلك

حسّيت إنه الكون رح يركع

والشمس ماتت

 

بنتي كمان يا فاطمة

غابت عليها الشمس

وراحت

وما رجعت

 

طلع الصبح فرحان

والشمس طلعت

فردت على الحارة

فرشتها

 

قلت:

وإحنا كمان يا فاطمة

بنودع الأحباب

ونطلّ عالحارة

ولازم يا مكلومة

كل يوم

متل ما الشمس تطلع

إحنا كمان

صحيح نوّاحات

لكن رح نطلع..!

 

ـ   ـ   ـ

 

23-6-2012 3:55 AM
التعليق
الاسم
عنوان التعليق
البريد الالكتروني
المهنة
التعليقات
التعليقات
جميع الحقوق محفوظة مؤسسة فلسطين للثقافة - © 2013